KFA-  رۆژی یەكشەممە لە بارەگای خۆیدا یەكێتی تۆپی پێی كوردستان بە ئامادەبوونی سەرۆك و جێگر و گشت ئەندامانی كۆبوونەوەی ئاسایی خۆی ئەنجامدا و چەندین راسپاردەی راگەیاند.

1- داوا لە لقەكانی ( هەولێر، دهۆك، سلێمانی، كەركوكك) یەكێتی تۆپی پێی كوردستان دەكەین، كە هەڵبژاردەی تازەپێگەیشتووانی شارەكانیان دەستنیشان بكەن بەمەبەستی ئەنجامدانی یاری دۆستانە بۆ هەڵبژاردنی یاریزانی شیاو بۆ هەڵبژاردەی تازەپێگەیشتووانی عێراق، كە دەبێت یاریزان لە دایكبووی ساڵی (2000) بەرەو سەرەو بێت.

2- بریاردرا بە ناردنی (C.V) راهێنەرانی تۆپی پێی كوردستان بۆ یەكێتی تۆپی پێی عێراق بەمەبەستی كاركردنیان لەگەڵ ستافی راهێنەرانی هەڵبژاردەكانی عێراق، راهێنەران لە لایەن لقەكانی تۆپی پێی پارێزگاكانی كوردستان دەستنیشانكراوە(هەولێر، سلێمانی، كەركووك، دهۆك).

3- دوای ئەنجامدانی وردبینی لەسەر دەنگەكانی رۆژنامەنووسان بۆ دەستنیشانكردنی باشترین یاریزان و گۆڵچی لە خولی نایابی پێشمەرگەی كوردستان و وەرگرتنی سەرجەم بۆچوونی سەرجەم راهێنەران و كاپتنی یانە بەشداربووەكانی خولی نایابی پێشمەرگەی كوردستان ئەنجامەكانی باشترینەكان بەمشێوەیە بوو:

أ- رەوا یوسف یاریزانی یانەی پێشمەرگەی هەولێر بووە باشترین یاریزانی خولەكە.

ب- دیار جومعە گۆڵپارێزی یانەی كەركووك بووە باشترین گۆڵپارێزی خولەكە.

4- لە یاری نێوان هەردوو یانەی كەركووك و شێروانە لە خولی نایابی پێشمەرگەی كوردستان بەهۆی كۆنترۆلنەكردنی جەماوەر و هاوێشتنی دەبەی ئاو و یارییە ئاگرینەكان بۆ نێو یاریگا و دروستكردنی كێشە بریاردرا بە غەرامكردنی یانەی كەركووك بە بری (300.000) سێ سەد هەزار دینار.

5- ئاگاداری سەرجەم یانەكان و هاندەران دەكەینەوە بەهەموو شێوەیەك یارییە ئاگرینەكان لە نێو یاریگاكان قەدەغەیە، داوا لە دەزگا ئەمنیەكان دەكەین هاوكار و یارمەتیدەرمان بن بۆ قەدەغەكردنی.

6- لە یاری نێوان هەردوو یانەی شێروانە و پێشمەرگەی هەولێر لە خولی نایابی پێشمەرگەی كوردستان بەهۆی ئاژاوە و گرفتی جەماوەر و هاوێشتنی یاری ئاگرین بریاردرا بە غەرامەكردنی یانەی شێروانە بە بری (300.000) سێ سەد هەزار دینار.

7-بەهۆی كەمتەرخەمی لە بەرێوەبردنی یاری نێوان هەردوو یانەی كەركووك و شێروانە بریاردرا بە راگرتنی ناوبژیوانی ناوەراست (دلشێر عومەر) بۆ سێ یاری لە بەرێوەبردنی یارییەكان.

8- بەهۆی كەمتەرخەمی لە بەرێوەبردنی یاری نێوان هەردوو یانەی (نەورۆز و كەركووك) بریاردرا بە راگرتنی یاریدەدەری ناوبژیوان (سەربەست خالید) بۆ سێ یاری لە بەرێوەبردنی یارییەكان.

9- لەسەر داوای یانەكانی شێروانە و نەورۆز، دوای ئەوەی جێگری سەرۆكی یەكێتی تۆپی پێی كوردستان گفتووگۆی لەگەڵ هەردوو یانە ئەنجامدا بریاردرا بە بردنی جامی (یەكەم، دووەم) و ملووانكەی (یەكەم، دووەم) بۆ هەردوو یاریگەی شێروانە لە كەلار و پێشمەرگەی هەولێر لە پیرمام بەمەبەستی دابەشكردنی خەڵاتەكانی پلەی یەكەم و دووەم لە كاتی تەواوبوونی یارییەكان لە نێو یاریگا.

10- بەمەبەستی رێكخستن و راگرتنی هەردوو یاریگای كەلار و پێشمەرگەی هەولێر بەشێوەیەكی جوان بریاردرا بە تەنیا رێگە بە فۆتۆگرافەری هەردوو یانە و سەرپەرشتیاری راگەیاندن بدرێت لە نێو یاریگا ئامادە بن، رۆژنامەنووسانی وەرزشی لە دەرەوەی یاریگا شوێنی تایبەتیان بۆ دابین دەكرێت بەهۆی بچووكی یاریگای پێشمەرگەی هەولێر.

Leave a Reply