KFA- له‌ گه‌ری چواره‌می خولی نایابی پێشمه‌رگه‌ی كوردستان له‌ قۆناغی چوارگۆشه‌ی زێرین، یانه‌ی پێشمه‌رگه‌ی هه‌ولێر له‌ یاریگه‌ی خۆی رووبه‌رووی یانه‌ی شێروانه‌ بوویه‌ و یارییه‌كه‌شی به‌ ئه‌نجامی (3-1) گۆڵ لێ برده‌وه‌.

نیوه‌ی یه‌كه‌می یارییه‌كه‌ به‌ ریتمێكی خێرا ده‌ستیپێكرد، له‌ خوله‌كی (2) یانه‌ی میوان له‌ رێگه‌ی گۆڵكاری خوله‌كه‌ (عه‌لی محه‌ممه‌دئه‌مین) نزیك بوو له‌ تۆماركردنی گۆڵی یه‌كه‌م، به‌ڵام تۆپه‌كه‌ به‌ ته‌نیشت ستوون تێپه‌ڕی، چوار خوله‌ك دوای ئه‌مه‌ دڵی به‌رگری پێشمه‌رگه‌ی هه‌ولێر (عه‌بدوڵڵا عه‌لی) له‌ لێدانێكى گۆشه‌دا گۆڵی یه‌كه‌می یانه‌كه‌ی به‌ لێدانی سه‌ر تۆماركرد.

له‌ خوله‌كی 11 (عامر فازڵ) ـی هێرشبه‌ری پێشمه‌رگه‌ی هه‌ولێر به‌ لێدانێكی به‌هێز به‌ختی خۆی تاقیكردووه‌، به‌ڵام گۆڵپارێزی شێروانه‌ (حه‌سه‌ن حوسێن) له‌ شوێنی گونجاو وه‌ستابوو, له‌ خوله‌كی 16 (عه‌لی محه‌ممه‌دئه‌مین) جارێكی دیكه‌ نزیك بوو له‌ تۆماركردنی گۆڵ، به‌ڵام تۆپه‌كه‌ی چووه‌ ده‌ره‌وه‌.

تا خوله‌كی 30 یارییه‌كه‌ هه‌ر به‌ ریتمێكی خێرا به‌رێوه‌ ده‌چوو، هه‌ردوو یانه‌ به‌ هێرشه‌كانیان وڵامی یه‌كتریان ده‌دایه‌وه‌، له‌ خوله‌كی 34 مایسترۆی شێروانه‌ (محه‌مه‌د سابیر) ده‌رفتێكی له‌ نێو ناوچه‌ی سزا له‌ ده‌ستدا.

(كاروان حه‌مه‌ ساڵح) ـی راهێنه‌ری شێروانه‌ له‌ باڵه‌كانه‌وه‌ فشاری زۆری له‌سه‌ر گۆڵی پێشمه‌رگه‌ی هه‌ولێر هێنابوو، له‌ به‌رانبه‌دا (سه‌میر بابۆ) ـی راهێنه‌ری پێشمه‌رگه‌ی هه‌ولێر زیاتر له‌ ناوه‌ڕاستی یاریگا كۆنترۆڵی كردبوو پشتی به‌ یاری كۆمه‌ڵ ده‌به‌ست, له‌ خوله‌كی 37 (هێمن رزگار) یاریزانی شێروانه‌ ده‌رفه‌تێكى ئاسانی له‌ ده‌ستدا، له‌ دوا ساته‌كانی گێمی یه‌كه‌م (هه‌ردی محه‌ممه‌د) یاریزانی شێروانه‌ لێدانێكی به‌هێزی ئاراسته‌ی گۆڵی پێشمه‌رگه‌كانی هه‌ولێری كرد، به‌ڵام (كاوه‌ ئه‌حمه‌د) ـی گۆڵپارێز تۆپه‌كه‌ی دوورخسته‌وه‌ و نیوه‌ی یه‌كه‌می یارییه‌كه‌ش به‌ ئه‌نجامی گۆڵێكی بێ به‌رانبه‌ر بۆ پێشمه‌رگه‌ی هه‌ولێر ته‌واو بوو.

نیوه‌ی دووه‌م به‌ هێرشه‌كانی پێشمه‌رگه‌ی هه‌ولێر ده‌ستیپێكردووه‌ و له‌ خوله‌كی 53 (ره‌وا یووسف) له‌ لای راستی یاریگا تۆپێكی ئاراسته‌ی گۆڵی شێروانه‌ كرد، به‌ڵام بێ ئاكام بوو, سێ خوله‌ك دواتر (هاورێ جه‌لال) به‌ لێدانێكی مووشه‌ك ئاسا ڕه‌وانه‌ی گۆڵی شێروانه‌ كرد، به‌ڵام تۆپه‌كه‌ به‌سه‌ر ستوون تێپه‌ڕی, له‌ خوله‌كی 57 له‌ پاسێكی جوانی (عامر فازڵ)، عه‌بدوڵڵا سه‌ربه‌ست گۆڵی دووه‌می یانه‌كه‌ی و حه‌فته‌می خۆی له‌ خوله‌كه‌ تۆماركرد.

دوای ئه‌مه‌ (كاروان حه‌مه‌ ساڵح) راهێنه‌ری شێروانه‌ بۆ زیاتر به‌هێزكردنی باڵه‌كانی ده‌ستی به‌ گۆرانكارییه‌كانی كرد له‌ خوله‌كی 61 (كوردستان زاهیر) ـی ناوبژیوان لێدانێكی سزای بۆ شێروانه‌ لێدا (محه‌مه‌د سابیر) سه‌ركه‌وتووانه‌ جێبه‌جێكرد و گۆڵی یه‌كه‌می بۆ یانه‌كه‌ی تۆماركرد.

تا خوله‌كی 75 ـى یارییه‌كه‌ زۆرترین كات تۆپ له‌ ناوه‌راستی یاریگا له‌ نێوان هه‌ردوو یانه‌ ئاڵۆگۆری پێده‌كرا، (سه‌میر بابۆ) هه‌ریه‌كه‌ له‌ (عومه‌ر سه‌دام) و ( هیوا جه‌لال) ـی خسته‌ نێو یاریگه‌ و ئه‌م گۆرانكاریانه‌ش هاوسه‌نگی یارییه‌كه‌ی به‌ لای پێشمه‌رگه‌ی هه‌ولێر كێش كرد, له‌ خوله‌كی 84 (هیوا جه‌لال) له‌ هه‌وڵێكی تاكه‌كه‌سی (عومه‌ر سه‌دام) ـی هاورێیدا گۆڵی سێیه‌م و دڵنیایی بۆ یانه‌كه‌ی تۆماركرد، به‌م ئه‌نجامه‌ش (3-1) گۆڵ یارییه‌كه‌ به‌ سوودی پێشمه‌رگه‌ی هه‌ولێر كۆتایی هات و به‌ حه‌وت خاڵ پێشه‌نگی له‌ شێروانه‌ وه‌رگرت.

هه‌ردی مالیك ـ هه‌ولێر

فۆتۆ: ئومێد ئیبراهیم

Leave a Reply